யாழில் தனித்திருந்த மூதாட்டி கொலை தொடர்பில் சந்தேகநபர் கைது!
யாழ் இராசாவின் தோட்டம் பகுதியில் தனித்திருந்த மூதாட்டியான மரியநாயகம் காணிக்கையம்மா ஜெயசீலி எனும் 72 வயதான மூதாட்டி கொலை செய்யப்பட்ட சம்பவம் தொடர்பில் சந்தேகநபர் கைதுசெய்யப்பட்டுள்ளார்.
கொலை நடந்த இடத்திற்கு அண்மையாகவுள்ள தச்சு வேலை செய்யும் இடத்தில் வேலைசெய்துவந்த புண்ணாலைக்கட்டுவனைச் சேர்ந்த இளைஞன் ஒருவன் கைதுசெய்யப்பட்டுள்ளார்.
குறித்த மூதாட்டியின் பிள்ளைகள் வெளிநாட்டில் வசித்துவரும் நிலையில் மூதாட்டி தனிமையில் வசித்து வந்துள்ளார். வீட்டின் மேல் தளத்தில் பல்கலைக்கழக மாணவர்கள் நான்கு பேர் வாடகைக்கு தங்கியிருந்துள்ளனர்.
வீட்டில் வேலை இருப்பதாகவும் வேலைக்கு ஆள் வரும் என்று கூறி அயல் வீட்டில் கோடாலி , மண்வெட்டி போன்ற பொருட்களை வாங்கி வைத்திருந்ததாகவும் தெரிவிக்கப்படுகிறது.
மதியம் மூதாட்டி அழும் சத்தம் கேட்டு அயலவர்கள் ஓடிச்சென்று பார்த்தபோது தலையில் காயத்துடன் செபம் சொல்லியபடி இரத்த வெள்ளத்தில் காணப்பட்டுள்ளார். இதன் போது வீட்டில் வேலை செய்துகொண்டிருந்த வரைக் காணவில்லை என அயலவர்கள் தெரிவித்துள்ளனர். வழக்கமாக மூதாட்டி தங்கச் சங்கிலி ஒன்று அணிந்திருப்பதாகவும் தற்போது தங்கச் சங்கிலி காணவில்லை எனவும் அயலவர்கள் தெரிவித்துள்ளனர்.
வீட்டில் வேலை செய்தமைக்கான தடயங்களும் இன்னும் சில தடயங்களும் காணப்பட்ட நிலையில் யாழ் குற்றத்தடுப்பு பொலிஸார் மேற்கொண்ட விசாரணைகளையடுத்து அப்பகுதியிலிருந்த CCTV பதிவினூடாக குறித்த சந்தேகநபர் இனங்காணப்பட்டு கைதுசெய்யப்பட்டுள்ளார். யாழ் குற்றத்தடுப்பு பொலிஸார் தீவிர விசாரணைகளை மேற்கொண்டுள்ளதாக தெரிவிக்கப்படுகிறது.
