அதிகாரிகளின் அசமந்தம்! நெல்லியடியில் பெண்கள் பயணிகள் அசெளகரியம்!
நெல்லியடி மத்திய பேருந்து நிலையத்தில் உள்ள மலசல கூடம் பராமரிப்பின்றி, பாவனைக்கு உதவாத நிலையில் காணப்படுவதனால் பொதுமக்கள் சிரமங்களை எதிர்நோக்கி வருகின்றனர்.
குறித்த பேருந்து நிலையத்திற்கு பேருந்துக்களில் நீண்ட தூரங்களில் இருந்து பலர் வருகை தருகின்றனர். மலசல கூடம் பராமரிப்பின்றி பாவனைக்கு உதவாத நிலையில் உள்ளமையால் இயற்கை உபாதைகளுக்கு உள்ளாவோர் சிரமங்களை எதிர்நோக்கி வருகின்றனர்.
இது தொடர்பில் இலங்கை போக்குவரத்து சபையினர் , கரவெட்டி பிரதேச சபையினர் எவ்வித நடவடிக்கையும் எடுக்கவில்லை. மலசல கூடத்தினை தூய்மையாக பேண சம்பந்தப்பட்ட அதிகாரிகள் நடவடிக்கை எடுக்க வேண்டும் என மக்களால் கோரிக்கை விடுக்கப்பட்டுள்ளது.
இதேவேளை இரவு வேளைகளில் பேருந்து நிலையத்தில் கூடும் போதைப்பிரியர்கள் சிலர் அங்கே மது அருந்துதல் , போதைப்பொருள் பாவனை போன்ற செயற்பாடுகளில் ஈடுபட்டு வருகின்றனர். இதனால் பேருந்து நிலையம், அதனை சூழவுள்ள பகுதிகள், மலசல கூடங்கள் என்பன வெற்று பியர் ரின்கள் , வெற்று மதுப்போத்தல்கள் என்பன அவ்விடத்தில் பரவலாக காணப்படுகின்றன.
இவ்வாறான செயற்பாடுகளினால் இரவு வேளைகளில் பேருந்துக்களில் வந்து பேருந்து நிலையத்தில் இறங்கும் பெண்கள் உள்ளிட்ட பயணிகள் அச்சத்துடனேயே இறங்கி செல்கின்றனர்.
எனவே இது தொடர்பிலும் சம்பந்தப்பட்ட கரவெட்டி பிரதேச சபை நடவடிக்கை எடுக்க வேண்டும் என கோரிக்கை விடுக்கப்பட்டுள்ளது.