கம்பஹா – யக்கல பகுதியில் தனியார் வகுப்புக்கு சென்ற 14 வயதுடைய மூன்று மாணவிகள் நேற்றுமுன்தினம் மாலை முதல் காணாமல் போயுள்ளதாக யக்கல மற்றும் வீரகுல பொலிஸ் நிலையத்தில் முறைப்பாடு செய்யப்பட்டுள்ளதாக பொலிஸார் குறிப்பிட்டுள்ளனர்.
காணாமல்போன மாணவிகளின் தாய்மார்களே குறித்த முறைப்பாடுகளை செய்துள்ளதாக சிரேஷ்ட பொலிஸ் அதிகாரி ஒருவர் தெரிவித்துள்ளார்.
காணாமல் போன மூன்று மாணவிகளும் கம்பஹா யக்கல பிரதேசத்தில் உள்ள பாடசாலை ஒன்றில் 9ஆம் ஆண்டில் கல்வி கற்கின்றனர். அத்துடன் குறித்த மாணவிகள் மூவரும் நேற்றுமுன்தினம் இரவு வரை வீட்டுக்கு வரவில்லை எனவும் தெரிவிக்கப்படுகின்றது.
காணாமல்போன மூன்று மாணவிகள் தொடர்பில் நேற்று வரை எவ்வித தகவலும் தமக்கு கிடைக்கவில்லை என யக்கல மற்றும் வீரகுல பொலிஸார் குறிப்பிட்டுள்ளனர்.
இது தொடர்பில் சிறுவர் மற்றும் பெண்கள் பணியகத்தின் அதிகாரிகள் மற்றும் யக்கல மற்றும் வீரகுல பொலிஸ் குற்றப் புலனாய்வுப் பிரிவினர் விசாரணைகளை மேற்கொண்டு வருகின்றனர்.
