முச்சக்கரவண்டி சாரதி மர்ம மரணம்!
மட்டக்களப்பு தலைமையக பொலிஸ் பிரிவுக்குட்பட்ட பார்வீதி பெரிய உப்போடை வீதியில் முச்சக்கர வண்டி சாரதி ஒருவர் சடலமாக மீட்கப்பட்டுள்ளார்.
கருவப்பங்கேணி பகுதியைச் சேர்ந்த மாசிலாமணி தர்மரட்ணம் எனும் 48 வயதான இரண்டு பிள்ளைகளின் தந்தையே சடலமாக மீட்கப்பட்டுள்ளார். இவர் மட்டக்களப்பு புகையிரத நிலையத்தில் இருந்து சேவையில் ஈடுபட்டு வருபவர்.
இன்று(25) காலை 4 மணியளவில் பயணிகளை ஏற்றுவதற்காக வீட்டிலிருந்து புறப்பட்டுள்ளார் . புகையிரத நிலையத்திலிருந்து புன்னைச்சோலை பகுதிக்கு பயணி ஒருவரை ஏற்றிச் சென்றுள்ளார். காலை 6 மணியளவில் பார் வீதி பெரிய உப்போடை வீதியில் சடலமாக மீட்கப்பட்டுள்ளார். அவருடைய முச்சக்கர வண்டி சேதமடைந்த நிலையில் காணப்பட்டுள்ளது.
முச்சக்கர வண்டி சாரதி மரணம் தொடர்பில் மர்மம் நிலவுவதாகவும் தொடர்ந்து விசாரணைகள் இடம்பெற்று வருகின்றன என பொலிஸார் தெரிவித்துள்ளனர்.